Sangoe Leladi #3

Sabarang reh, sabarang gawe, lan kanijatan jen dipikir klawan mateng wis tjetha bakal betjik dadine, lakonana kanthi ati manteb madhep, adja nganti diganggoe tjara was soemelang, moela ampoeh prabawane. Ndjalari wong jen toemandange sarwa minggrang-minggring, jen ngranggeha sarwa gajoek-gajoek toena, jen loemakoe, djoemangkaha tansah mandheg toemoleh. Apamaneh, jen olehe tolah-toleh ngadhang-adhang pitoeloengan lijan, ikoe mratandhani koeranging kapertjajan marang awake dhewe. Rasa was soemelang ikoe padha bae karo ngapesake awake dhewe. Lan, sapa kang tansah digegirisi rasa was soemelang, ija bakal gampang kenaning apes, tangeh tansah toemibaning slamet. Moela, prajoga disingkiri

Kang bisa mangerti marang kabetjikan, ngemoengake wong kang wis mangerti prekara kang diarani ala. Geni ora bisa mateni geni. Mangkono oega piala ora bisa mbengkas piala, moeng kabetjikan. Jen kowe doewe krenteg arep nindakake kabetjikan, tindakna saiki. Jen kok semayani sesoek wis ora bisa nindakake kabetjikan maoe. Dene jen doewe krenteg ala, soemenekna sesoek, bokmenawa ora sida kok tindakake, merga wis mateng poetoesanmoe. Males ala marang wong kang gawe ala, pantjen gampang. Nanging, jen njta prawira, pialaning lijan, walesen ing kabetjikan. Kang diarani kaoetaman, ora moeng njirik tindak ala, nanging ora doewe pepenginan nglakoni ala. Ikoe sedjatining kaoetaman.

---

Marganing tata tentrem ikoe sepisan soegih kawroeh. Kapindo: ati boeroes kang ginajoehe sarana nggegoelang megaring rokhani, lan oeriping djasmani ora botsih. Ora gampang ketarik ing gelar, kasengsem ing tata lair. Kasengsem ing semat lan dradjad andjoeroeng marang sipat ngangsa-ngangsa toewin pangwasa. Kasengsem ing wanod'ja-ju, lerege dhemen dolanan oetawa digawe dolananing wanod'ja. Kasengsem kang kaja ngono ikoe jen dioembar noekoelake angkara. Kamangka angkara mono ora doewe pamarem. Moela prajoga singkirana.

Jen lagi nandhang sangsara, ketokna koewanen lan kasantosaning atimoe. Emas bisa kasoeroepan moernine, sarana linoeloeh ing geni, balik manoengsa, bisane katon kaprawirane jen tineter ing kasangsaran. Dak kira kang dadi toeking kasangsaran manoengsa ikoe, ora lija kedjaba moeng anggone aras-arasen roemagang ing gawe, lan gampang olehe nglokro. Kekoewataning ati loewih prajoga di-enggo anggegoelang ngrasakake sangsara, tinimbang kanggo nggegoelang soepaja bisa lan weroeh marang kasangsarane...dhewe.